ରାଜସ୍ଥାନ : ରାଜସ୍ଥାନର ଭରତପୁର ଜିଲ୍ଲାରେ କ୍ରେଶର ପ୍ଲାଣ୍ଟକୁ ନେଇ ଦୀର୍ଘଦିନ ଧରି ଚାଲିଥିବା ବିବାଦ ଉଗ୍ର ରୂପ ନେଇଛି । ଏହି ସଂଘର୍ଷରେ ବୟାନାର ପୂର୍ବତନ ବିଧାୟକ ତଥା ବିଜେପି ନେତା ଅତର ସିଂହ ଭଡ଼ାନାଙ୍କ ମୃତ୍ୟୁ ହୋଇଛି । ଠେଙ୍ଗା ଓ ପଥରରେ ଭଡାନାଙ୍କ ଉପରେ ଆକ୍ରମଣ ହୋଇଥିବା ଅଭିଯୋଗ ହୋଇଛି । ଭଡ଼ାନାଙ୍କ ଉପରେ ୭୦ରୁ ୮୦ ଜଣ ଲୋକ ଆକ୍ରମଣ କରିଥିବା ଜଣାପଡିଛି । ଘଟଣା ପରେ ଭୌଣ୍ଡା ଗାଁରେ ଉତ୍ତେଜନା ଦେଖାଦେଇଥିବାରୁ ପୋଲିସ ମୁତୟନ କରାଯାଇଛି ।
ଖବର ମୁତାବକ, ରବିବାର ସନ୍ଧ୍ୟା ପ୍ରାୟ ୬ଟା ୩୦ ମିନିଟ୍ ସମୟରେ ଭୈର ଥାନା ଅଞ୍ଚଳର ଭୌଣ୍ଡା ଗାଁରେ ଥିବା ନିଜ କ୍ରେଶର ପ୍ଲାଣ୍ଟରେ ଅତର ସିଂହ ଭଡ଼ାନା ଉପସ୍ଥିତ ଥିଲେ । ଏହି ସମୟରେ ଗ୍ରାମବାସୀ ଏବଂ ଭଡ଼ାନାଙ୍କ ପକ୍ଷ ମଧ୍ୟରେ ବିବାଦ ବଢିବାରୁ ଏହା ସଂଘର୍ଷର ରୂପ ନେଇଥିଲା । ୭୦ରୁ ୮୦ ଜଣ ଲୋକ ଠେଙ୍ଗା ଓ ପଥରରେ ଆକ୍ରମଣ କରିଥିଲେ । ଏଥିରେ ଅତର ସିଂହ ଭଡ଼ାନା ଏବଂ ତାଙ୍କ ସହଯୋଗୀ ଗଗନ ଶର୍ମା ଗୁରୁତର ଆହତ ହୋଇଥିଲେ । ଉଭୟଙ୍କୁ ପ୍ରଥମେ ଭୈର ଉପଖଣ୍ଡ ହସ୍ପିଟାଲକୁ ନିଆଯାଇଥିଲା । ପରେ ଅବସ୍ଥା ଗୁରୁତର ହେବାରୁ ଭଡ଼ାନାଙ୍କୁ ଜୟପୁରର SMS ହସ୍ପିଟାଲ ଏବଂ ଗଗନ ଶର୍ମାଙ୍କୁ ଭରତପୁରକୁ ସ୍ଥାନାନ୍ତର କରାଯାଇଥିଲା । ଜୟପୁର ହସ୍ପିଟାଲରେ ରାତି ପ୍ରାୟ ୧୧ଟା ୩୦ ମିନିଟରେ ଚିକିତ୍ସାଧୀନ ଅବସ୍ଥାରେ ଭଡ଼ାନାଙ୍କ ମୃତ୍ୟୁ ହୋଇଥିଲା ।
ଅତର ସିଂହ ଭଡ଼ାନାଙ୍କ ପତ୍ନୀ ପୋଲିସ ଓ ପ୍ରଶାସନର କାର୍ଯ୍ୟପ୍ରଣାଳୀ ଉପରେ ପ୍ରଶ୍ନ ଉଠାଇଛନ୍ତି । ତାଙ୍କ ଅଭିଯୋଗ ଅନୁସାରେ, କ୍ରେଶର ପ୍ଲାଣ୍ଟର ଲିଜ୍ ସଂଯୋଗ କାଟି ଦିଆଯାଇଥିଲା ଏବଂ ଜଳ ପମ୍ପକୁ ମଧ୍ୟ ଖରାପ କରି ଦିଆଯାଇଥିଲା । ଏହା ସହ ଲିଜ୍ ଅଞ୍ଚଳକୁ ଯାଉଥିବା ଲୋକଙ୍କୁ ମଧ୍ୟ ଅଟକାଯାଉଥିଲା ବୋଲି ସେ ଅଭିଯୋଗ କରିଛନ୍ତି । ଏହା ବିଷୟରେ ପୋଲିସ ଓ ପ୍ରଶାସନକୁ ବାରମ୍ବାର ଜଣାଯାଇଥିଲେ ମଧ୍ୟ କୌଣସି ପ୍ରଭାବଶାଳୀ ପଦକ୍ଷେପ ନିଆଯାଇନଥିଲା । ରବିବାର ସନ୍ଧ୍ୟା ୬ଟା ୩୦ରୁ ୭ଟା ମଧ୍ୟରେ ୭୦ରୁ ୮୦ ଜଣ ଲୋକ ତାଙ୍କ ସ୍ୱାମୀ ଏବଂ ଅନ୍ୟମାନଙ୍କ ଉପରେ ଆକ୍ରମଣ କରିଥିଲେ ।
ପୋଲିସ ଅନୁଯାୟୀ, କ୍ରେଶର ପ୍ଲାଣ୍ଟକୁ ନେଇ ପ୍ରାୟ ଚାରି ବର୍ଷ ପୂର୍ବରୁ ମଧ୍ୟ ପ୍ଲାଣ୍ଟ ପରିଚାଳକ ଏବଂ ଗ୍ରାମବାସୀଙ୍କ ମଧ୍ୟରେ ବିବାଦ ଓ ମାରପିଟ୍ ହୋଇଥିଲା । କ୍ରେଶର ପ୍ଲାଣ୍ଟ ପାଇଁ ଗୋଚର ଜମି ଜବରଦଖଲ କରାଯାଇଥିବା ଏବଂ ବେଆଇନ ଖଣି ଖନନ ହେଉଥିବା ଗ୍ରାମବାସୀ ଅଭିଯୋଗ କରିଥିଲେ । ଏହା ସହ ଲିଜ୍ ଅଞ୍ଚଳକୁ ଯିବା ରାସ୍ତାକୁ ନେଇ ମଧ୍ୟ ବିବାଦ ରହିଥିଲା ।
ଗ୍ରାମବାସୀଙ୍କ ଅଭିଯୋଗ ଅନୁସାରେ, ରବିବାର ଭଡ଼ାନାଙ୍କ ପକ୍ଷରୁ ୪୦ରୁ ୫୦ ଜଣ ଲୋକ ଘଟଣାସ୍ଥଳରେ ପହଞ୍ଚି ସେମାନଙ୍କୁ ଧାରଣାସ୍ଥଳରୁ ହଟାଇଥିଲେ । ଏହା ପରେ ଉଭୟ ପକ୍ଷ ମଧ୍ୟରେ ସଂଘର୍ଷ ହୋଇଥିବା ସେମାନେ କହିଛନ୍ତି । ବର୍ତ୍ତମାନ ଗାଁରେ ପୋଲିସ ମୁତୟନ ରହିଛି ଏବଂ ଘଟଣାର ତଦନ୍ତ ଚାଲିଛି । ସଂଘର୍ଷ କିପରି ଆରମ୍ଭ ହେଲା, ଏଥିରେ କେଉଁମାନେ ସାମିଲ ଥିଲେ ଏବଂ ଗୁଳିମାଡ଼ ଅଭିଯୋଗରେ କେତେ ସତ୍ୟତା ରହିଛି, ତାହା ତଦନ୍ତ ପରେ ସ୍ପଷ୍ଟ ହେବ ।
